Academi Arweinyddiaeth Cenedlaethau’r Dyfodol

Rhaglen bartneriaeth yw Academi Arweinyddiaeth Cenedlaethau’r Dyfodol o dan arweiniad Comisiynydd Cenedlaethau’r Dyfodol Cymru, Sophie Howe

Er mwyn cyflawni dyheadau Deddf Llesiant Cenedlaethau'r Dyfodol, gosododd y Comisiynydd chwe maes blaenoriaeth ar gyfer ei thymor, sy'n cynnwys adeiladu 'sgiliau ar gyfer y dyfodol.' Bydd y rhaglen hon yn cefnogi pobl ifanc gyda chyfleoedd i ddysgu a gwella eu sgiliau, er mwyn sicrhau bod gennym arweinyddiaeth gref yng Nghymru heddiw ac yn y dyfodol. Bydd y rhaglen arweinyddiaeth uchelgeisiol ac arloesol hon yn gweld partneriaid o bob rhan o’r sector cyhoeddus, preifat a’r trydydd sector yn cydweithredu i hyfforddi rhwng 20-30 o bobl ifanc o bob rhan o Gymru mewn datblygu arweinyddiaeth ac yn y Ddeddf Llesiant ar gyfer Cenedlaethau’r Dyfodol. Ym mis Tachwedd 2021, bydd y Comisiynydd yn lansio ail raglen Academi, yn dilyn peilot llwyddiannus yn 2019-2020. Mae manylion y rhaglen gyntaf i'w gweld isod - a chyhoeddir manylion pellach am yr ail academi yn fuan. Yn ystod y rhaglen bydd y cyfranogwyr yn herio meddwl cyfredol trwy fentora o chwith ac yn cydweithredu ag arbenigwyr a llunwyr penderfyniadau ar yr heriau mwyaf dybryd. Bydd y rhaglen hon yn helpu ein harweinwyr ifanc i adeiladu'r sgiliau, y wybodaeth a'r rhwydweithiau sydd eu hangen arnynt i wneud penderfyniadau ar gyfer gwell gwasanaethau cyhoeddus yng Nghymru nawr ac yn y dyfodol. Mae manylion rhaglen academi eleni ar gael yma a gwnewch gais yma erbyn 15fed o Hydref 2021.  Isod mae trosolwg o Academi Arweinyddiaeth Cenedlaethau'r Dyfodol 2019-2020.